Si Aida, Si Lorna, Si Fe at AKO

google

Tatlong babae, di magkamayaw kung sino

Tatlong alas, ang pang-apat ay ako

Tatlong mukha, kaakit-akit, nakakalito

Tatlong eba, sinong pipiliin mo?

Si Aida, isang babaeng mayumi

Di makabasag pinggan animo di’y pipi

Kagandahang taglay, ika’y lubos na mawiwili

Huwag kang palinlang, si Aida’y may sapi.

Si Lorna, kakaiba parang lalaki kung umasta

Takot sa kanya maging mga basagulero sa kalsada

Maliksi, palaban di patutumba

Ngunit sa tuwing nag-iisa, luha’y dumadaloy sa kanyang mga mata.

Si Fe, haliparot, pokpok, malandi, kaladkarin

Walang modo, bastos, boba ganun kung sya’y tawagin.

Kaliwa’t kanan lalaki nya’y kay dami-dami,

Isa,dalawa,tatlo, kasinungalingang kanilang sabi-sabi.

Si Aida, Si Lorna, Si Fe

Iba’t ibang karakter, iba’t ibang pagkatao

Balat kayo, balat kayo, sino ba sa kanila ang totoo?

Tatlong babae, mga mata’y imulat ninyo.

Si Aida, Si Lorna, Si Fe

Hulaan mo, kilala mo ba sila?

Masasabi mo ba kung sila’y nasa harapan mo na?

O sandyang bulag ka, ayan na’t di mo pa rin alintana.

Si Aida, Si Lorna, si Fe at Ako

Bakit pati sarili ko’y idinadamay ko dito?

Tatlong babae, ano ba ang mapapansin nyo?

Katulad din nilang tatlo…

……..hindi ako perpekto.